МЕСЯЦА ИЮЛЯ В 30-й ДЕНЬ
Служба на память святаго Иоанна, воина и чудотворца
НА ВЕЛИЦЕЙ ВЕЧЕРНИ
Блажéн муж: 1-й антифóн. На Гóсподи, воззвáх: стихиры на 8, глас 2.
Подóбен: Егдá от Дрéва:
Егдá тлéнному царю вóинствуя на земли, вéрен Богу, Иоáнне, воин был еси, тогда Небеснаго Царя Христá пóмощь приим, мучеником Христóвым помогáя, побеждáл еси враги видимыя и невидимыя; и ныне со Ангельскими Силами и вóинствы в Вышних ликуеши. Тéмже, блажéнне страстонóсче, Спасителю всех за ны молися спасти души наша. Двáжды.
Земнóе вóинство остáвити восхотéв, Небéсному Царю Христу потщáлся еси угодити; вéрою бо в Него вооружився, силою честнáго Креста Его воин крéпок, Иоáнне, обрéлся еси, от мучителей злочестивых мученики Христóвы сохраняя молитвами твоими к Богу, блажéнне.
Егдá вéрою во Христá Бога и молитвою преподóбных жребий получити возжелáл еси, тогда вéры рáди Христóвы мучащимся спосóбствовал еси. Сегó рáди даровáнии чудéс обогати тя Христóс Госпóдь, в различных бо скóрбех призывающим тя помóщник скор обретáешися. Тéмже молися Богу о нас, творящих всечестную пáмять твою.
Ины стихиры, глас тойже.
Подóбен: Киими похвáльными:
Приидите, святолюбцы, вси духóвно возвеселимся и торжествуим, славяще Христá и Бога нашего, яко пребогáтую трапéзу днесь нам предложи, память слáвнаго мученика и дóбляго воина Иоáнна, помóщника всем в скóрбех, и злых дел обличителя, и погублéний тáйных явителя, просящим его пóмощи.
Богодаровáнную благодáть Иоáнна восхвáлим песнопéнии, благочéстия побóрника, храбраго воина, изящнаго чудотворца, помóщника обидимым, благовéрным предстáтеля и врачá безмéзднаго, в вóинстве ратобóрца, и от напрасных смéртей хранителя, и путей благих извéстника, мóлится бо Богу вся люди благодéйствовати.
Преблажéнне добропобéдный Иоáнне, воине крепкий Всетворцá нашего Бога, ты душéвное твое благорóдие богоизбрáнне соблюл еси, презрéв суету и прéлести мира, человеколюбне сущим в мучéниих спострадáл еси. И ныне в Небесéх со Христóм слáдце водворяешися, отнюдуже назирáй и сохраняй в ратобóрстве и во всяких злоключéниих вся, призывáющия тя.
Что Тебе принесéм, Твóрче Боже? Кóе воздадим благодарение? Яко даровáл еси людем Твоим истинную благодать, святáго Иоáнна, воина благочестива, милости творителя, на брáнех воином спосóбника, всяких печалей утéшителя и молитвенника тебе во спасение наше тéплаго. Тéмже ради милости твоея спаси ны, Владыко Человеколюбче.
Слава, глас 6:
За Христá усéрдно, Иоáнне, подвизáвся с мученики Христóвыми, в вéре благочестивей христиáном помоществуя, яко воин изряден твоему Владыце был еси. Требующим подавáя питáние, и милостыню изобильно нищим уготовляя, небрéгл еси повелéния Иулиáна, законопреступнаго царя, разрушáя же мучительныя его сосуды, изящен добропобéдник в Правослáвии явился еси. Тéмже прешéл еси в Небéсныя крóвы, и тáмо Христá Иисуса всерáдостно зриши, Иже нетлéнным: увязé тя венцéм, Егоже, всеблажéнне, непрестáнно моли вéчнаго блажéнства сподóбитися достóйно чествующим тя.
И ныне, Богорóдичен: Кто Тебе не ублажит:
Вход. Прокимен дне. И чтения 3 мученическая.
Прорóчества Исáиина чтéние (главá 43):
Тáко глагóлет Госпóдь: вси языцы собрáшася вкупе, и соберутся князи от них, кто возвестит сия в них? Или яже от начáла, кто слышана сотворит вам? Да приведут свидéтели своя, и оправдятся, и да услышат, и да рекут истину. Будите Ми свидéтели, и Аз Свидéтель, глагóлет Госпóдь Бог, и óтрок, егóже избрáх, да познáете, и вéруете Ми, и разумéете, яко Аз éсмь, прéжде Менé не бысть ин бог и по Мне не будет. Аз есмь Бог, и несть, рáзве Менé, спасáяй, Аз возвестих и спасóх, уничижих и не бе в вас чуждий. Вы Мне свидéтели, и Аз Господь Бог, и ещé от начáла Аз есмь, и несть от рук Моих избавляяй, сотворю, и кто отвратит то? Сице глагóлет Госпóдь Бог, избавляяй вас, Святый Изрáилев.
Премудрости Соломóновы чтéние (главá 3):
Прáведных души в руце Бóжией, и не прикóснется их мука. Непщевáни быша во очесéх безумных умрéти, и вменися озлоблéние исхóд их. И éже от нас шéствие сокрушéние, они же суть в мире. Ибо пред лицéм человéческим аще и муку приимут, уповáние их безсмéртия испóлнено. И вмáле накáзани бывше, великими благодéтельствовани будут, яко Бог искуси я и обрéте их достóйны Себé. Яко злáто в горниле, искуси их и, яко всеплóдие жéртвенное, прият я. И во врéмя посещéния их возсияют и, яко искры по стéблию, потекут. Судят языком и обладáют людьми, и воцарится Госпóдь в них во вéки. Надéющиися Нань разумéют истину и вéрнии в любви пребудут Ему, яко благодáть и милость в преподóбных Его и посещéние во избрáнных Его.
Премудрости Соломóновы чтéние (главá 4):
Прáведник áще постигнет скончáтися, в покóи будет. Стáрость бо честнá не многодéтна, нижé в числé лет исчитáется. Седина же есть мудрость человéком, и вóзраст стáрости, житиé несквéрное. Благоугоден Бóгови быв, возлюблен бысть и живый посредé грéшник престáвлен бысть. Восхищéн бысть, да не злóба изменит рáзума его или лéсть прельстит душу его. Рачéние бо злóбы помрачáет дóбрая, и парéние пóхоти пременяет ум незлóбив. Скончáвся вмáле, испóлни лéта дóлга, угóдна бо бе Гóсподеви душа его, сегó рáди потщáся от среды лукáвствия. Людие же видевшее, и не разумéвше, нижé полóжше в помышлéнии таковóе, яко благодáть и милость в преподóбных Его и посещéние во избрáнных Его.
На литии стихиры, глас 8:
Мучениче Христóв, прехвáльне Иоáнне, гонителя беззакóннаго царя стремлéния и нуждную смерть ни во чтóже вменил еси, благодéрзостно и мужемудренно ополчився к борéнием. Тéмже победоносною слáвою венчáвся, причéлся еси всем прáведным, с нимиже тя хвáляще, ублажáем.
Мучениче Христóв, преблажéнне Иоáнне, видя Христóвы мученики, на заклáние ведóмы, друголюбно óнем помогал еси. Страдáти бо до крóве и смéрти тыя поучáя, глагóлал еси: ничтóже есть зде наше страдáние противу будущаго на Небесéх воздаяния. Тáже и сам спострадáти тем любвé рáди Творцá твоего подвиглся еси, сегó рáди, от Христá Бога чудес даровáние приéм, в различных напáстех стрáждущим помогáеши, и изымáеши от лютых бед слáвящия Гóспода и чествующия любóвию свящéнная твоя страдáния.
Мучениче Госпóдень, непобедимый Иоáнне, благодáти нося имя, благодáть и милость подавáеши вéрно молитвами тя призывáющим, и привóдиши в рáдость люди богомудрыя, вéрно в пóмощь напáстей своих зовущия тя и чествующия священнорáдостную память твою, тéмже молися Христу Иисусу, да спасéт ны от всех бед, яко Всесилен.
Слава, глас 4:
Кто не удивится, или кто не прослáвит, или не воспоéт верномудраго и слáвнаго Христóва воина Иоáнна чудеса? Яко и по честнéм своéм преставлéнии, всем подаéт, притекáющим усéрдно к нему, премнóгая врачевствá, ибо честныя и святыя его мóщи источáют благодáть изобильну в полéзная прошéния. Тéмже благочéстно вопиéм ему: моли непрестáнно Господа, да спасéт вся правослáвныя люди, вéрою во святый твой храм притекáющия, и просящия тéплаго к Богу заступлéния, тебé бо усéрдна ходáтая к Нему имамы и молитвенника о душах наших.
И ныне, Богорóдичен: Призри на молéния:
На стихóвне стихиры, глас 4.
Подóбен: Яко дóбля:
Многообрáзными мучéнии лютый мучитель казнити предадé святóе тéло твое.Ты же, Богомысленне Иоáнне, не отвéрглся еси Христá, ни кумиром пожéрл еси, но претерпéл еси дóблественне, ожидáя будущаго воздаяния, некончáемаго в Бóзе наслаждéния.
Стих: Прáведник яко финикс процветéт, яко кедр, иже в Ливáне, умножится.
Добродéтельным твоим житиéм мíр презрéл еси, Иоáнне чудотвóрче, и вéлие милосéрдие христиáном в чиноначáльстве твоего вóинства сотворяя, в свобóду óнех пущáл еси. Отнюдуже и сам за Христá Бога в вéре Правослáвней пострадáв, приял еси наслéдие вéчнаго блажéнства.
Стих: Насаждéни в дому Госпóдни, во двóрех Бога нашего процветут.
Исцелéний даровáние источáют твоя, слáвне, мóщи чествующим тя усéрдно, потопляюща стрáсти и врачующа недуги, Иоанне, и разоряют лукáвых дéмонов толпы, напояют же вéрных сердцá, иже прозябáют добродéтелей плоды Божéственныя и благочéстия разумéние.
Слава, глас 8:
Приидите, христолюбивии людие, дóбрый пóдвиг и благодушное мужество во благовéрии сотворéнное разумне созерцáим. Нóвый бо венéчник Иоáнн, великий молитвенник и мученик, сице вопиéт царю богомéрзкому, законопреступному Иулиáну: злокóзненными твоими словесы в сладострáстие суетнаго сегó мíра не мóжеши мя прельстити, нижé отлучиши любвé Всетворцá моегó Бога, аз бо на Него уповáю и к Нему все мое желáние простирáю, да Его Небеснаго Царствия буду наслéдник. Тéмже, слáвяще Христá Царя, мученика хвáлим и усердно днесь в пáмяти его прóсим: святе Иоáнне, молися выну мíр миру даровáти, и душáм нáшим вéлию милость.
И ныне, Богорóдичен: Владычице, приими:
Тропáрь, глас 4:
Всеблагáго Бога и Царя благовéрный раб и воин явился еси, Иоáнне чудодéтелю, пострадáв бо ради вéры мужески, блажéнно же скончáв течéние, зриши Всетворцá Гóспода в Небесéх светлéйше. От Негóже приéм даровáние чудéс, стрáждущим человéком во всяких напáстех помогáеши, укрепляеши воины в рáтех, от врагов пленéния, ран же и внезáпных смертéй и от бед лютых изымáеши. Тéмже моли Владыку Христá, приснопáмятне, да во всяком обстоянии сотворит нам милость и не введéт нас во искушéния, но спасéт души нáша, яко Человеколюбец.
Ин тропáрь, глас 8:
Блажéнство евáнгельское возлюбив, Богомудре Иоáнне, чистоту сéрдца дéвством почтил еси. Тéмже суету мíра сегó пренебрéг, устремился еси зрéти Бога, Иже тя прослáви чудесы во врачевáнии различне стрáждущих. Сегó рáди мóлим тя: проси нам у Христá Гóспода всяких скорбéй избавлéния и получéния Царства Небеснаго.
Слава, и ныне, Богорóдичен.
НА УТРЕНИ
На Бог Госпóдь: тропáрь святáго, дважды. Слава, и ныне, Богорóдичен во глас тропаря.
По 1-й стихолóгии седáлен, глас 1.
Подóбен: Гроб Твой, Спáсе:
Стрáсти честных видев мучеников, и тех целовáв узы, на высоту востéкл еси свидéтельства, пречудне, и желание все ко Христу возложив, стрáждущим помогáя и áлчущия питая, всем милостивый заступник был еси, дóндеже в руце Госпóдни душу твою предáл еси, Иоáнне многострадáльне.
Слава, и ныне, Богорóдичен:
Надéждо христиáн, Пресвятáя Дéво, Егóже родила еси Бога пáче умá и слóва, непрестáнно моли с Вышними силами и со страстотéрпцем Иоáнном дáти оставлéние грехóв нам всем, и исправлéние жития, вéрою и любóвию присно Тя прославляющим.
По 2-й стихолóгии седáлен, глас 8.
Подóбен: Премудрости:
Царю векóв Безсмéртному угождáя, истукáнным не пожéрл еси, царя же беззакóннаго всякия совéты злокóзненныя отразил еси, слáвне, Того рáди жéртву тебé самáго принéсл еси Пожéршемуся Слóву. Тем и чудéс источáеши струи в напáстех стрáждущим, милостивый предстáтелю и молитвенниче ко Христу Богу, Иоáнне великий, вóине Царя Христá Бога нашего, Егóже моли грехóв оставлéние даровáти чествующим любóвию святую пáмять твою.
Слава, и ныне, Богорóдичен:
Солнца óблаче разумнаго, Божéственнаго свéта светильниче златоковáнный, Несквéрная, Неблáзная, Всенепорóчная Владычице, омрачéнную душу мою ослеплéнием страстéй безстрáстия зарéю просвети, молюся, и осквернéнное моé сéрдце очисти потóки умилéния, покаяния же слезáми омый нечистоту дел моих, да любóвию зову Ти: Богорóдице Приснодéво, моли Христá Бога прегрешéний оставлéние подáти ми, Тебé бо имам надéжду, раб Твой.
Величáние:
Величáем тя,/ страстотéрпче святый, мучениче Иоáнне Вóине,/ и чтим честнáя страдáния твоя,/ яже за Христá/ претерпéл еси.
Псалóм избрáнный: Бог нам прибéжище и сила:
По полиелéи седáлен, глас 4.
Подóбен: Удивися Иóсиф:
Яко дóблему страдáльцу и вóину крéпкому Всецарюющаго Христá, взывáем ти, Иоáнне: рáдуйся, мучеником украшение и лéпото; рáдуйся, свéтлая Цéркве звездó и стенó и пристáнище притекáющим к тебе, великомучениче слáвне, Иоáнне Вóине. Тя поющия спасáй твоими молитвами от всякаго врéда чуждáго и от лютых озлоблéний избáви.
Слава, и ныне, Богорóдичен:
Яко к Царице, Небéсныя силы превосходящей, сущей Матери Христá Бога нашего, Держáвней Помóщнице рода нашего, припадáюще, мы, грéшнии раби Твои, умилéнно вопиéм Тебе: Владычице Дéво Марие Богорóдице, во все врéмя жизни нáшея присно управляй ны в вóлю Гóспода Царя Небéснаго, и сохраняй от всяких напáстей и недугов душéвных и телéсных, не вверяющи человéков пóмощи, и помилуй ны, Всепéтая.
Тáже степéнна, 1-й антифóн 4-го глáса. Прокимен, глас 4: Прáведник, яко финикс, процветéт, яко кедр, иже в Ливáне, умнóжится. Стих: Насаждéни в дому Госпóдни, во двóрех Бога нашего процветут. Всякое дыхáние: Евáнгелие от Иоáнна, зачáло 51.
По 50-м псалмé стихира, глас 6:
Днесь созывáет нас страстотéрпца всемирное торжествó: приидите, боголюбцы, свéтло прáзднуим пáмять его, глагóлюще: рáдуйся, великомучениче Иоáнне, Царя Небéснаго вóине непреборимый, ибо ты повелéние безумное законопреступнаго царя Иулиáна, идолочтителя, преобидел еси мужески; рáдуйся, блажéнне, страстотéрпцем Христóвым помóщниче, яко тыя в гонéнии от злочестивых в вéре Правослáвней утверждáл еси, и им любéзно сострадáл еси. Сегó рáди Христóс даровáнии чудéс обогатил тя есть, моли убо Всеблагáго Бога спасти души наша.
Канóн
Богорóдицы на 6, и святáго на 8, два канóна.
Канóн святáго, глас 2.
Песнь 1
Ирмóс: Грядите, людие, поим песнь Христу Богу, раздéльшему море и настáвльшему люди, яже изведé из рабóты египетския, яко прослáвися.
Свéтлое прáзднество твоé, святе Иоáнне, рáдостно на духóвную трапéзу нас созывáет, в нéйже учреждáеши ны вся, к тебе притекáющия, даровáнии, в пóльзу прошéния нам исполняя.
Пóдвигом дóбрым подвизáвся на земли, преблажéнне Иоáнне, и от злáго мучителя мученики Христóвы сохраняя, приял еси от Христá Бога Небéсную жизнь, отнюдуже в скóрбех нам подáждь пóмощь.
Вóинством истинным, Богомудре, злочестиваго царя небрéг мучительства, и богáтство нищим Христá рáди расточив, приял еси дар чудес от Бога, лукáвыя человéки обличáя, благочестивым спосóбствуеши.
Вóинство земнóе небрéгл еси, иногдá Христá рáди тéло своé удручáя постóм и молитвою, и враги посрамил еси. Сегó рáди и чудесы от Бога обогатился еси.
Богорóдичен: Воплотися из Тебе боголéпно Слово Безплóтное премнóжеством человеколюбия, Пречистая Дéво; Егóже, Владычице, моли вéчное блажéнство даровáти нам.
Другий канóн, глас 1.
Песнь 1
Ирмóс: Вознесу Тя, Боже, Спáсе мой, яко воскрéсл еси от мéртвых, попрáв смерть.
Иисусе, Спáсе наш, подáждь нам усéрдие благодарити Тя о всем и восхвалити угóдника Твоего, Иоáнна.
Страстотéрпче славне Иоáнне, богомудрым смыслом ввóинился еси Всетворцу Богу, победи убо вся враги наша.
Зрéти удостóивыйся Бога воплощéна, всехвáльне воине, молим тя: твоими мольбами избави ны от всех бед.
Богорóдичен: Богорáдованная, Слóва Предвéчнаго Палáто, Марие Дéво, милосéрдием Твоим сердцá наша в скóрбех увеселяй о Бóзе присно.
Песнь 3
Ирмóс: На кáмене мя веры утвердив, разширил еси устá моя на враги моя, возвесели бо ся дух мой, внегдá пéти: несть свят, якоже Бог наш, и несть прáведен, пáче Тебе, Гóсподи.
С мученики несумнéнну вéру стяжáв, благодушне, и Христу Иисусу быв воин, добродéтельми обогатился еси; тéмже совершáющим пáмять твою честную благóе просвещéние всегда дáруй.
Лукáвнующим зле невидимый гонитель, мучениче Христóв, являешися и крадьбы, в тáйне сущия, открывáеши, приял бо еси власть от Бога полéзная ко спасéнию всем содевáти.
Якоже столп непоколéблем, сéрдце твоé, всечéстне Иоáнне, имея, любовь мучеником Христóвым сотворил еси, не бояся царéва суровствá, тéмже в любви Госпóдни утверждáтися нам помози.
Яко дерзновéние имéя к Богу, Иоáнне, воин ныне Небéсному Царю сый, проси нам грехóв оставлéния, прáзднующим память твою.
Богорóдичен: Богорóдице, Мати Гóспода Иисуса, со всеми святыми Того моли избáвити ны от всех бед и скорбéй, яко да посрáмятся вси, являющии рабóм Твоим злая, хвалити же с Сыном Тя присно нас сподóби.
Ин
Ирмóс: Утверждéй слóвом Твоим вселéнную, яже не подвижится, утверди и нашу мысль в страх Твой, Владыко Гóсподи.
Тебе, Творцу нашему Богу, во всяком обстоянии, припáдающе, мóлимся: мученика Твоего мольбáми, в вóли и любвé Твоей, утверди нас.
Твéрдым умóм стал еси на правотé богознáния, Богоблажéнне Иоáнне, тéмже утверждáй души наша, во Гóсподе надéжду во всем полагáти.
Пóхоть плóти, пóхоть очéс и гóрдость жития презрéв, утвердился еси в любви Иисусове, мучениче, нам в тóежде помóщник буди.
Богорóдичен: Всеблажéнная Владычице, утверждáющаго вся Христá Гóспода порóждши, в прóмысле Его пребывáти укрепи ны всегда.
Ин кондáк, глас 3:
Великая скóрбным людем рáдость в бедáх обретáешися, чудотвóрче Иоáнне, всякия бо стрáсти молящим тя врачуеши, исполняя их прошéния. Тéмже и ныне моли Гóспода, да спасéт ны в милости Своей.
Седáлен, глас 8.
Подóбен: Премудрости:
Царю Небéсному и Творцу векóв угождáя присно, законопреступнаго Иулиáна мучителя вся злоковáрныя и богомéрзкия совéты отразил еси, слáвне, идолом бездушным жéртвы возбранив творити, и тáко в пóдвизе душу твою в руце Гóсподу Богу прéдал еси. Егóже моли, святе Иоáнне, прегрешéний оставлéние нам даровáти, чествующим святую пáмять твою.
Слава: Мужеством души вéрою вооружився, глагóл Бóжий, яко копиé, взéм, врага уязвил еси, мучеником похвалá и удобрéние, великий Иоáнне.
И ныне, Богорóдичен:
О Тебе рáдуется, Благодáтная, всякая тварь, Ангельский собóр и человéческий род, освящéнный хрáме и раю словéсный, Дéвственная Похвалó, из Неяже Бог воплотися, и Младéнец бысть, прéжде век Сый Бог наш; ложеснá бо Твоя Престóл сотвори, и чрéво Твоé прострáннее Небéс содéла. О Тебе рáдуется, Благодáтная, всякая тварь, слáва Тебе.
Песнь 4
Ирмóс: Пришéл еси от Дéвы не ходáтай, ни Ангел, но Сам, Гóсподи, воплóщся, и спáсл еси всего мя, человéка. Тем зову Ти: слава силе Твоей, Гóсподи.
Уподóбился еси распéншемуся волею на Дрéве Христу Богу нашему, всечéстне, сраспéнся Ему всяким воздержáнием, молитвою же, и милостынею, и многими добродеяньми.
Се даже до смéрти, Иоáнне мучениче, смирился еси: святыя бо твоя мóщи на мéсте в погребéнии стрáнных быша сокровéны, сегó ради Госпóдь по всей вселéнней тебе прослáви.
Царя преступника Иулиáна вóинство тлéнное во влáсти содержáв, от тогó пóслан был еси убивáти Христóвы мученики. Но ты, блажéнне, тыя храня, в вéре утверждáл еси, во éже пéти: слава силе Твоей, Гóсподи.
Небéснаго рáди рáдования и будущаго прáведным весéлия земнáя вся остáвил еси мудровáния, и, всячески добродéтельми Богу угождáя, за ны молися, Иоáнне всечéстне.
Богорóдичен: Недоумéние во спасéние предлежит ми, от обышéдших мя зол, Пречистая. Тéмже избави мя от них скоро, благоразумие подающи, к Тебе бо единей прибегóх, Богомáти.
Ин
Ирмóс: Разумéх, Всесильне, Твоé смотрéние и со стрáхом прослáвих Тя, Спáсе.
Вéлие Твоé, Гóсподи, смотрéние во всем мíре, емуже усéрдно предаéмся, Тебе со святыми молящеся.
Пóдвиг добр, мучениче, во страдáнии совершив, благоразумием во стрáсе Гóспода прославляти помози нам.
Братолюбне в гонéнии людем Бóжиим помогáл еси, страх отвéргий мучителей, Иоáнне: страх напáстей отвéржи от нас.
Богорóдичен: Всесильнаго Царя Царица и Мати сподóбилася еси бытии, сподóби ны слáвити Его к нам в милости смотрéние.
Песнь 5
Ирмóс: Свéта Подáтелю и векóв Твóрче, Гóсподи,во свéте Твоих повелéний настáви нас, рáзве бо Тебе, инóго бога не знаем.
Тáин Божéственных вкусив в рáзуме, Иоáнне, прóповедь Бóжия рождéния исповéдал еси, глагóля пред всеми: инóго бога, рáзве Всетворцá, не знаю.
Возлюбившаго Гóспода любите, – возглагóлал еси, страстотéрпче, стрáждущим мучеником, в Егóже любви утвердився, обогатился еси чудесы, врачуя болéзни мнóгия.
Славу мíра сего ни во чтóже, Богомудре вóине, вменил еси, слáвы рáди Христóвы, тéмже, страдáльчество совершив и слáвы Божéственныя сподóбився, нам получити óную молися.
Не убоявся законопреступнаго царя повелéния, вместо мук христиáны заступáше, и сокрывáхуся твоим повелéнием, и сего ради воин бысть Царю силам.
Богорóдичен: Тя, Владычице, мóлим, слáвяще Твоé о нас милосéрдие: всяких ны скорбéй, Марие, свободи и помози утреневати нам к Богу и вéчнаго блажéнства сподóбитися.
Ин
Ирмóс: От нóщи невéдения просвещéй концы, просвети мя утром человеколюбия Твоего, Гóсподи.
Человеколюбче Владыко, просвещáй ны в пáмяти молéбней страдáльца Твоего утреневати к Тебе благоговéинством.
Просветился еси, мучениче Иоáнне, богодаровáнными чудесы, тем от злых человéк, тщеты и болéзни слáвящия тя премени.
Светонóсным утром, побеждáя вся душетлительныя враги дóблественне, от скóрбных тьмы страстéй во свет радости привлецы ны.
Богорóдичен: Яже Бога во плóти нашей родила еси, Дéво Пречистая, свéтом Небéсным осиятися нам Ему молися, милость ко всем простирáющи.
Песнь 6
Ирмóс: В бéздне грехóвней валяяся, неизслéдную милосердия Твоего призывáю бéздну: от тли, Боже, мя возведи.
Силою Бóжиею укрепився, мучеников слáво, Иоáнне, прещéний нечестивых небрéгл еси; ныне же зря рáдостне Бога, от злых нас избáви.
Молитвами и постóм и в целомудрии всяким воздержáнием Богу угодил еси, всечéстне; свыше назирáя, свобождáй ны от скóрби.
Просимая чествующим тя вéрно, блажéнне, подаéши, злыя человéки обличáя, о кáющихся же Богу моляся.
Мученическое дерзновéние восприим, потщáлся еси по вéре Христóве поборáти, якоже добрый воин, вооружи себé силою Крестá Госпóдня, от Негóже дáром чудес обогатися.
Богорóдичен: Уврачуй, Богорóдице, стрáсти душ и телéс нáших, Врачá Христá нам порóждши, и врáжие злоковáрство посрами милосéрдием Твоим.
Ин
Ирмóс: Со Иóною вопиéм Ти, Гóсподи, со глáсом хвалéния молящеся: возведи от тли живóт наш.
Не престáнем молити Тя, Всещéдраго Гóспода, подвижуще с нами вéрнаго воина, изымáя от грех, всели ны в Небéсную жизнь.
Хвáлиши, святе Иоáнне, в Вышних Бога, вéрно зде служив Ему, отнюдуже приближися и нам, тя хвáлящим, во спасéние.
Стрáсти Христá рáди терпéв, всехвáльне, всерáдостное блажéнство получил еси, тéмже и наша мольбы прими, и введи ны в радость.
Вéлию вéру стяжáл еси ко Христу Богу, велики же и дáры чудес Божéственных приял еси от Него, и от дéйствия их проявился еси. И ныне творящих твоé прáзднество и пáмять молися Гóсподеви избáвити от всякия нужды и печáли.
Богорóдичен: Пречистая Дéво, от тлéния пагубонóснаго мíр спáсшая, от всякаго злáго обстояния нас избáви.
Кондáк, глас 6:
Благочестиваго вóина Христóва, победившаго враги душéвныя и телéсныя богомудренно, Иоáнна мученика достодóлжно пéсньми восхвáлим, чудодéйствуя бо, подаéт обильная исцелéния стрáждущим людем, и мóлится Гóсподу Богу от всяких бед спасти правовéрныя.
Икос:
Кто пóдвиги твоя и страдáния рáди вéры в Гóспода Иисуса изрещи возмóжет, прехвáльне Иоáнне? Или киими тя увенчáем похвалáми, ради мужественнаго твоегó в закóне Гóсподни и во истиннем благочéстии стояния? Попрáл бо еси вся кóзни душетлителя врагá, целомудрием и всякими добротворéнии вооружився; богáтство и слáву и пóхоть врéдную возненавидев, нищету и поношéние Христóво возлюбил еси, стрáждущим в скóрбех помогáя. Тéмже, вселився в Небéсныя крóвы, даровáнии преслáвных чудес обогатился еси. Оттуду убо, блажéнне, вся, притекáющия к тебе, назирáй, пóмощи творя, во éже от всяких бед спасти правовéрныя.
Песнь 7
Ирмóс: Образу златóму, на пóли Деире служиму триé Твои óтроцы небрегóша безбóжнаго велéния, посредé же огня ввéржени, орошáеми, пояху: благословéн еси, Бóже отéц наших.
Безбóжное мучителя законопреступнаго велéние, страстотéрпче Иоáнне, преобидев, богочестив Всемогущаго Царя воин показáлся еси, благодáтне же орошáемь, с людьми Бóжиими пел еси: благословéн еси, Боже отéц наших.
Слáдкое и великое и рáдостное торжествó ныне люди Госпóдни облистá, éже мучеников дóблейший целомудрый Иоáнн вообрази. Тóчит бо цельбы молящимся вéрно Гóсподу, иже взывáют: благословéн еси, Боже отéц наших.
Дерзновéние имéя ко Владыце всех, святе Иоáнне, яко ближний угóдник Его, во обстоянии напáстей наших предстáтельствуй Ему о нас, и помогáй избáвитися нам от грехóв, да богомудренно поéм: благословéн еси, Боже отец наших.
Дерзновéние имéя к своему Владыце, о нас молитву сотвори, Иоáнне, и прошéния наша испóлни, и грехóв прощéния испроси нам молитвами твоими, вопиющим: благословéн еси, Боже отец наших.
Богорóдичен: Преслáвное совершися тáинство в Тебе, Богомáти, безсéменно бо зачалá еси Сына, брéмя грех наших упразднившаго. Тéмже, уповáние на Тя имуще и Твою помощь зряще, усéрдно вопиéм: благословéна еси, Дéво Владычице.
Ин
Ирмóс: Вся делá Твоя истинна и прáви путиé Твои, Боже отéц наших.
Безмéздный врачу Иоáнне, исцели молитвами твоими недуги и стрáсти душ и телéс Гóсподеви вопиющих: благословéн еси, Боже отéц наших.
Дéло всякия добродéтели испрáвил еси, и жéртву тя Всетворцу возложил еси, вопия: благословéн еси, Боже отéц наших,
Всеблагóму Богу в чистотé молитвою и постóм угождáя, мучениче, дáждь нам богоугóдне звáти: благословéн еси, Боже отéц наших.
Богорóдичен: Всенепорóчная Дéво, Путь и Истину, Христá, рóждши, руководи нас в Гóрнюю жизнь, к Богу отéц наших.
Песнь 8
Ирмóс: Пéщь иногдá óгненная в Вавилóне дéйства разделяше Божиим велéнием, халдéи опаляющая, вéрныя же орошáющая, поющия: благословите, вся делá Госпóдня, Гóспода.
Вышних ищáй, на земли прéлести возненавидел еси, Богоблажéнне. Тéмже, с мученики Христóвыми в любви духóвней соединився, дерзновéнно Богочеловéка Иисуса проповéдал еси, о Нéмже зовéши: благословите, вся делá Госпóдня, Гóспода.
Неоскудно трéбования подавáя, нищим был еси готóвый питáтель, вóине благочестивомудренне Иоáнне. И ныне, притекáющия к тебе назирáя, испóлни тех прошéния, да рáдостно зовéм: благословите, вся делá Госпóдня, Гóспода.
Всезритель Бог, усéрдие твоé, Иоáнне, и совершéнную вéру видев, прослáви тя слáвою вéчною. Егóже моли в пóльзе ущéдрити ны, богомудренно поющия: благословите, вся дела Госпóдня, Гóспода.
Молéния наша приими, ныне приносимая тебе, прáведному страстотéрпцу. Тебе бо дадé Госпóдь чудесéм даровáние подаяти просящим вéрно прошéния и превозносящим Христá во вéки и поющим: благословите, вся делá Госпóдня, Гóспода.
Богорóдичен: Марие Богоневéсто, к Тебе прибегáем и Тебе, припáдающе, мóлимся: виждь, Владычице, скорбь нашу и озлоблéние от враг наших, и умири жизнь всех нас, Миротвóрца порóждши Гóспода, Егóже благословим во вéки.
Ин
Ирмóс: Царя слáвы и Победителя смéрти, Иисуса Назорéя, Того превозносите во вся вéки.
Царю Небéсный, побéду на силу врáжию святóму Твоему мученику даровáвый, дáруй и нам во избавлéние от нужд слáвити Тя во вся вéки.
Царя Гóспода рáдостно, блажéнне, в Вышних узрéл еси, молися, да мы чистым сéрдцем Его превознóсим во вся вéки.
Царюяй во Христé воине, вся вáрвары победи, и злокóзненныя разори на нас совéты, да превознóсим Гóспода во вся вéки.
Царю цáрствующим и Гóсподу госпóдствующим воин изряден показáся и с прáведными венцéм венчáся нетлéнным от руки Вседержителя Гóспода.
Богорóдичен: Царице Всемóщная, Царя и Бога мáтерски моли, да вездé Его превознóсим и Тя, Госпожу, поéм во вся вéки.
Песнь 9
Ирмóс: Безначáльна Родителя Сын, Бог и Госпóдь, воплóщся от Дéвы, нам явися, омрачéнная просветити, собрáти расточéнная. Тем Всепéтую Богорóдицу величáем.
Добр явился еси посóбник, преслáвне, людем Бóжиим, гонимыя сокрывáя, и ныне чудéсне помоществуеши вéрным, сегó рáди в пáмяти благодеяний твоих Христá Бога величáем.
Твоя чудесá, преблажéнне Иоáнне, во всем мíре проповéдаются; тéмже и днесь, собрáвшеся, слáву возсылáем Христу, тебé прослáвльшему.
Нас, восхваляющих тя, мучениче Христóв, и твоея пóмощи просящих, днесь услыши, и к полéзным управляти не престáй, молитвенник теплéйший и ходáтай к Богу нашему являяся.
Изряден врач сердец человéческих чудодéянии явился еси, Иоáнне, помоществуя всем богочестивым; тем, воспевáюще тя, Христá величаем.
Богорóдичен: Пéти, Дéво, Тя не престаéм, Помóщницу, покрóв, скóрое заступлéние и Предстáтельницу нашу непостыдную; соблюди Твоя рабы от всякаго озлоблéния, и от кóзней лукáваго свобождáй присно.
Ин
Ирмóс: Служитель безплóтный предстá, глагóля Благодáтней: Госпóдь с Тобóю! Юже величáем.
Гóсподи сил, буди с нáми, укрепляя иерáрхи, иерéи же и вся люди Твоя, молитвами святáго спасáя, да благочéстно Тя и Богорóдицу непрестáнно вси величáем.
Молися, святе Иоáнне, Богу в Трóице, да удостóит вéрующия во имя Его богомудренно, яко Всетворцá, присно величáти.
Твою пáмять совершáющия, Госпóдень угóдниче, предстáв, от печáлей свободи и напóй рáдости, во éже с Богомáтерию Гóспода величáти.
Аще и на земли вóинство остáвив, но Небéсному Царю воин наречéся Христóв, лукáвых нахóды вспять возвращáя и вéрным прося грехóв прощéния. Тéмже, Иоáнне блажéнне, тя воспевáюще, Христá величáем.
Богорóдичен: Облагодáтствованная Марие, призри на вся люди Твоя милостию, да Тя безконéчно в рáдости величáем.
Светилен.
Подóбен: Со ученики:
Венценóсче святе, предстояй со Ангелы Христóву Престóлу и света оттуду исполняяйся, страстотéрпче, мир мíру молитвами твоими исходáтайствуй, и нам спасéние, благочéстно пáмять твою совершáющим и в скóрбех притекáющим к тебе, Иоáнне всебогáте.
Слава Отцу, и Сыну, и Святому Духу.
Подóбен: Нéбо звездáми:
Познáнием себе самáго, познáл еси Всетворящую Вину Бога, в Негóже и увéровал еси и, Тогó исповéдав, просвещáеши мíр чудесы, Иоáнне Богоблажéнне.
И ныне, Богорóдичен:
Во чрéве Твоéм Госпóдь, погибáющий мíр от тлéния призвáти восхотéв, якоже вéдяше, вселися, Богорóдице. Спасéние убо вси обрéтше, вопиéм Тебé: рáдуйся, Всепéтая Дéво, порóждши рáдость всей вселéнней, обрáдуй и нас, от врагóв злодéйства хранящи всегдá.
На хвалитех стихиры на 4, глас 6.
Подóбен: Всю отложивше:
Страдáния видев добропобéдных мучеников, дерзновéния Божéственнаго испóлнився, не убоялся еси мучителя злочестиваго царя, но, со усéрдием к ним пришéд, на подвиг укреплял еси их. С нимиже молися Господу, страдальче Иоáнне, спастися душам нашим.
Плóть с крóвию пáдающу видя мнóгих святых, от беззакóннаго царя Иулиáна стрáждущих за Христá Бога нашего, сим, блажéнне, во узах и злострадáниих помогáл еси, благóю бесéдою утешáя, да надéжды благия не отпáдают, но да ожидáют будущаго воздаяния и венцéв Небéсных рáдования.
Терпéнием твоим, Иоáнне всехвáльне, мзду стяжáл еси, душу твою всех Владыце в руце предáв, и от Него даровáнии чудéс обогатился еси. Моли убо Христá Бога о чтущих любóвию святую пáмять твою.
Зрéти тя сподóбися женá благочестивая, éйже ты, страдáльче, явився, повелéл еси честныя твоя мóщи прослáвити, тая же с рáдостию сия приéмши, с мирными благоухáнии церкви предложи. Молися, страдáльче, Христу Богу, и певцéм твоим подати вéлию милость.
Слава, глас 5.
Подóбен: Вострубим:
Стецéмся вéрою, и любóвию возопиим прáзднственная, и ликуим рáдующеся, в настоящее торжествó Христóва воина, Иоáнна прехвáльнаго; правослáвнии людие да стекутся, и лицы архиерéйстии да воспоют пéсньми страдáльческое прáзднество, вóинства Ангельская да весéлятся зряще. Тогó бо вéмы в бедáх предстáтеля, и унывáющим истинное рáдование, нищих обогатителя, и во всех находящих лютых утéшителя, и вся вездé тéпле предваряюща. Емуже ныне сице рцем: воине Христóв Иоáнне, спаси вéрою притекáющия ко свящéнному храму твоему, молитвами твоими.
И ныне, Богорóдичен, глас тóйже:
Вострубим трубóю пéсней: преклóньши бо ся свыше, Всецарица Мати Дева, благословéньми венчáет воспевáющия Ю. Людие да стекутся, и Царице да восплéщут в пéснех, Царя рóждшей, Иже смéртию пéрвее держимыя разрешити человеколюбно благоволи. Пáстырие и учителиé, Дóбраго Пáстыря Пречистую Матерь сошéдшеся, восхвáлим: Свéщник Златозáрный, Светонóсный Облак, Небéс Прострáннейшую, Одушевлéнный Кивóт, Огнезрáчный Владычень Престóл, манноприéмную златую Стáмну, затворéнную Слóва Дверь, всех христиáн Прибéжище, пéсньми благоглагóливыми похваляюще, сице рцем: Палáто Слóва, сподóби смирéнныя ны Небéснаго Цáрствия, ничтóже бо невозмóжно ходáтайству Твоему.
Славослóвие великое. И отпуст.
НА ЛИТУРГИИ
Блажéнны от канóна 1-го пéснь 3-я, на 4 и 2-го канóна пéснь 6-я, на 4. Прокимен, глас 7: Возвеселится прáведник о Гóсподе и уповáет на Негó. Стих: Услыши, Боже, глас мой, внегдá молити ми ся к Тебе. Апóстол к Римляном, зачáло 116. Аллилуйя, глас 4: Мнóги скóрби прáведным, и от всех их избáвит я Госпóдь. Евáнгелие от Матфéя, зачáло 69. Причáстен: В пáмять вéчную будет прáведник:
Молитва
О мучениче Христóв, Иоáнне Воине! Хрáбрый еси во брáнех, и врагóм прогонитель, и обидимым заступник, всем правослáвным христиáном великий заступниче и угóдниче Христóв. Иоáнне Воинственниче! Помяни нас, грéшных и недостóйных рабов, и заступи в бедáх, скóрбех, и печáлех и во всякой злой напáсти, и от всякаго злáго и обидящаго человéка, тебé бо данá бысть таковáя благодáть от Бога, éже молитися за ны, грéшныя, в бедáх и напáстех зле стрáждущия. Избáви убо нас от обидящих и ненавидящих, буди нам побóрник крéпок на вся видимыя и невидимыя враги наша. О великий побóрниче, Иоáнне Воине! Не забуди нас, всегда молящихся тебе, просящих пóмощи и неоскудныя милости твоей, и сподóби нас, грéшных и недостóйных, получити от Бога неизречéнная благáя, яже уготóвана любящим Его. Яко подобает Ему всякая слава, честь и поклонéние, Отцу и Сыну и Святóму Духу, ныне, и присно, и во вéки векóв. Аминь.
